काठमाडौं। नेपाली कांग्रेसको केन्द्रीय कार्यसम्पादन समिति बैठकमा सहभागी हुन सानेपा पुगेका नेता विमलेन्द्र निधि र कार्यालयमा प्रदर्शनरत समूहबीच धकेलाधकेल भएको छ।
पार्टी केन्द्रीय कार्यालय सोनपा घेराउका लागि पुगेका केही विशेष महाधिवेशन पक्षधरले नेता निधिलाई पार्टी कार्यालय प्रवेशमा अवरोध गरेका हुन्। त्यही क्रममा निधि र प्रदर्शनकारी कांग्रेस कार्यकर्ताबीच धकेलाधकेल भएको छ।
निधिले अवरोध गर्नेहरूलाई ‘को हो त्यो मान्छे? को हो? कांग्रेसी होइन यो, कांग्रेसी होइन’ भनेपछि विशेष महाधिवेशन पक्षधर कार्यकर्ताले ‘तपाईं चैं हो?’ भन्दै प्रतिप्रश्न गरेको आवाज सुनिन्छ। अहिले कांग्रेस कार्यालयको गेटमा सुरक्षाकर्मी परिचालन गरिएका छन्।
भित्र बैठक चल्दै गर्दा बाहिर रहेका नेतालाई प्रवेशमा रोक लगाइएको छ। आफ्नै पार्टी कार्यालयमा नेताहरू रोकिएपछि सानेपा परिसर केहीबेर नाराबाजी र तनाव भएको थियो। कांग्रेस कार्यालयभित्र पस्न नपाएका नेताहरूले यसलाई ‘नेतृत्वको अनुदारवादी र निरंकुश चरित्र’ भन्दै आलोचना गरेका छन्। उनीहरूले नेता निधिविरूद्ध नाराबाजी गरेका छन्।
