काठमाडौं। राष्ट्रिय स्वतन्त्र पार्टी (रास्वपा)का सभापति रवि लामिछानेले संसद्लाई प्रतिशोधको नभई बहसको थलो बनाइने बताएका छन्।
प्रतिनिधिसभाको आजको पहिलो बैठकमा रोस्टममा उभिएर बोल्दै उनले प्रतिपक्षीमाथि अहंकार र प्रतिशोधको अध्याय नदोहोरिने दाबी गरे ।
यद्यपि, शहीदको आमालाई न्याय दिलाउँदा त्यसलाई प्रतिशोध नभन्न उनको आग्रह छ ।
साथै, उनले आस्थाका आधारमा फरक व्यवहार नहुने र कसैको माइक नकाटिने बताए ।
‘म रास्वपाका साथीहरूलाई सम्झाउन चाहन्छु, हामी प्रश्न सोधेर आएको हो । हाम्रो बस्ने ठाउँ फेरिएको हो‚’ उनले रोस्ट्रममा उभिएर भने‚ ‘हामीलाई प्रश्न सोध्न मात्र होइन, उत्तर दिन पनि आउँछ । ती प्रश्नमा नैतिक जिम्मेवारी हाम्रो उस्तै छ ।’
उनले प्रतिपक्षी दललाई विनम्र अनुरोध गर्दै भने- ‘हामीमाथि २४ घण्टा निगरानी गरिदिनु होला । शासनमा तपाईंहरूको लामो अनुभव छ । हाम्रा कमजोरी उजागर गर्नुहोला, कमजोरी देखाइदिनुहोला ।’
उनले रास्वपामा अहंकार नबढोस्‚ जनताबाट टाढा नहोस् र एकतर्फी निर्णय नगरोस् भनेर निरन्तर दबाब दिन समेत अनुरोध गरे ।
